حيدر بابا ، ايلديريملار شاخاندا

سللر، سولار شاقيلداييب آخاندا،

قيزلار اونا صف باغليوب باخاندا،

سلام اولسون شوکتوزه ، ائلوزه

منيم ده بير آديم گلسين ديلوزه.

حيدربابا ، کهليکلرون اوچاندا

کول ديبينن دوشان قالخوب ، قاچاندا،

باخچالارون چيحکلنوب آچاندا،

بيزدن ده بير ممکن اولسا ، ياداله

آچيلميان      اورکلري       شاد اله

بايرام يئلي چارداخلاري ييخاندا،

نوروز گلي ، قارچيچگي چيخاندا،

آغ بولوتلار کوينکلرين  سيخاندا

بيزدن ده بير يادايليه ن ساغ اولسون

دردلريميزقوي ديکيلسون داغ اولسون.

.

.

.

حيدربابا، شيطان بيزي آزديريب،

محبتي اور کلردن قازديريب،

قره گونون سرنوشتين يازديريب،

ساليب خلقي بير-بيرينون جانينا!

باريشيغي    بلشديروب    قانينا!

گوز ياشينا باخان اولسا ، قان آخماز!

انسان  اولان  خنجر  بئلينه  تاخماز!

اما حيف ، کور توتدوغون بوراخماز!

بهشتيميز  جهنم  اولماقدا در!

ذيحجه ميز محرم اولماقدا در!

حيدربابا غيرت قانون قاينارکن،

قره قوشلار سنن قوپوب قالخارکن،

اوسيلديريم داشلارينان اوينارکن،

قوزان ، منيم  همتمي  اوردا گور،

اوردان  ايل ، قامتمي  داردا  گور!

حيدربابا،گئجه دورنا گئچنده،

کوراوغلونون گوزي قارا سئچنده،

قير آتيني مينوب ، کسيب ، بيچنده،

منده  بوردان  تئز  مطلبه  چاتمارام!

عيوض گليب چاتميونجان ، ياتمارام!

حيدربابا، مرداوغوللار دوغگينان،

نامردلرين بورونلارين اووگينان،

قوي قوزولار آيين-شايين اوتلاسين،

قويونلارين   قويروقلارين  قاتلاسين!

حيربابا ، سنون گويلون شاد اولسون!

دنياوارکن، آغزون دولي داداولسون!

سن گئچن تانيش اولسون، ياداولسون،

دينه :  منيم شاعر اوغلوم شهريار

بير عمردور غم اوستونه غم قالار!